Intezaar....

Intezaar hai aaj phir tumhaare aane ka,
badal rha hai rang aasman phir,
kuch mithaas abhi bhi rakhi hai honthon par
pichli mulakaaton ki..

jehen se nikalta hi nai
tumhaare saath hone ka ehsaas..
wo sare lamhe, aa baithte hain paas mere,
aur gungunate hain halki si dhun
mere kaano me...jo tum bunte ho apne khwabon me.

tumhaari nazar abhi bhi rakhi hai,
mere saaye me,
thodi jhuki si...mere ishaare par..
bahut khawaishen tairti hain,

jaanta hun hal-e-dil tumhara bhi main,
wo sabhi lafz jo tumne samet liye us ek din
chubte hain nashtar se mujhe bhi...

jo daayra bun liya hai tumne apne chaaron taraf,
usme kahan kaid ho sakega ,
wo har lamha...
wo har sukun jo hamne milkar baanta tha..

par phir bhi ek...
na-mumkin yakeen hai,
koi khidki to rakhi hogi..tumne khuli,
jis-se paigaam aa sake, us lau ka,
jo jal rahi hai dono taraf..

armaan nahi hai tumhe dag-magaane ka,
rahega har saath mera nibhaane ko,
har waada, jo le aaye tumhe kuch aur kareeb..
kabhi nikalna chaho is daayre se bahar kuch der to..
milunga baitha tumhe,
usi mod par...jahan chod gaye the tum...